बाँकेमा एकैदिन चार सङ्क्रमितको निधन

बाँकेमा उपचाररत चार कोरोना सङ्क्रमितको अस्पतालमै निधन भएको छ ।

बाँके राप्तीसोनारी गाउँपालिकाका ४८ वर्षका पुरुष, टीकापुर नगरपालिकाकी ५६ वर्षकी महिला, तुल्सीपुर उपमहानगरपालिकाकी २० वर्षकी महिला र तुल्सीपुर उपमहानगरपालिकाका ७६ वर्षका पुरुषको उपचारकै क्रममा निधन भएको जिल्ला स्वास्थ्य कार्यालय बाँकेका कोरोना स्रोत व्यक्ति नरेश श्रेष्ठले जानकारी दिनुभयो ।

उहाँका अनुसार, श्वास प्रश्वास प्रक्रियामा समस्या आएपछि भेरी अस्पताल नेपालगञ्जमा भर्ना हुनुभएका शम्शेरगञ्ज निवासी ४८ वर्षीय पुरुषको शुक्रवार साँझ ५ः२० बजे मृत्यु भएको हो । त्यस्तै दाङ निवासी ७६ वर्षीय पुरुषको शिक्षण अस्पताल कोहलपुरमा शुक्रवार साँझ ६ः४० बजे उपचारकै क्रममा मृत्यु भएको थियो भने कैलाली निवासी ५६ वर्षीया महिलाको शिक्षण अस्पताल कोहलपुरमै दिउँसो २ः४५ बजे र दाङ निवासी २० वर्षीया महिलाको दिउँसो ३ः२० बजे मृत्यु भएको छ ।